السفاح الجزء الثاني
بسم الله
السفاح ج ٢
..
مشينا لآخر الطريق مع الدم لاقينا نفسنا وصلنا لقريه كدا
مش كبيره أوي يعني 50 بيت ولا حاجه
مشينا شويه في القريه مش سامعين أي صوت ولا شايفين بني آدم فيها
وصلنا لبيت في نص القريه كدا كان أكبر بيت في القريه
قلت لعلي بلاش نخبط أحسن يطلعلنا حد زي إلي شوفناه من شويه
قالي متخافش مفيش أنا معاك
علي خبط علي الباب لاقينا راجل كبير في السن كدا طلعلنا
وقالنا "إيه ده إنتوا مين ؟ و إيه إلي جابكوا هنا ؟"
قولناله إن عربيتنا عطلت علي الطريق وعاوزين حد يصلحها و كدا
قالنا طب تعالوا خشوا اقعدوا معايا هنا في البيت لحد الصبح و هنشوف حد يصلحلكوا العربيه
علي قالي" طالما لاقينا حد في القريه دي خليك إنت هنا علي ما أروح
أجيب أختي من العربيه و آجي "
قولتله آجي معاك ؟ قالي لا خليك إنت هنا
علي راج يجيب أخته وقالها كل حاجه حصلت
ونا فضلت مع الراجل في البيت
الراجل قالي "إيه إلي حدفكم علينا هنا يبني ؟ المنطقه دي منطقه مقطوعه "
قولتله دا إحنا كنا رايحين المصيف و العربيه بتاعتنا عطلت في السكه
قالي علي العموم عندنا واحد في القريه إسمه فتحي ممكن يفهم في العربيات
هو كان عنده عربيه بيسافر بيها للشغل و ممكن يفهم في الكلام ده
وفيه أوضتين فوق هتقعدوا فيهم لحد ما الصبح يجي و نشوف عربيتكم
قولتله الف شكر يا عم الحاج ربنا يكرمك
في نص الكلام كان علي جه هو و أخته سميه
وقعدوا معانا
علي فضولي قاله"صحيح يا عم الحاج مشوفتوش هنا في القريه
واحد بلطجي طويل عريض كدا معاه عصايا حديد ؟؟؟"
الراجل العجوز خاف كدا ووشه قلب ألوان و قالنا "لا مشوفناش أي حد هنا في القريه ممكن يكون في مكان تاني ولا حاجه"
علي قاله " الراجل ده كان طالع من القريه بتاعتكم وكان ساحب راجل معاه كمان من رجله يعني أكيد شوفتوه"
الراجل العجوز قالنا "بصوا أنا هقولكوا علي الحقيقه يا ولادي بس خلوا بالكوا من نفسكوا
الراجل دا مجنون إسمه فاضل إحنا مسميينه هنا السفاح بييجي هنا ياخد أكل و يمشي وأي حد بيقف قصاده بيضربه و ياخده معاه يعذبه و يقتله
عرفت إنه كان طفل شوارع و شاف الذل بعيد عنك
وكان بيتعذب و هو صغير و عينه الشمال متصفيه
الناس الي خدوه ربوه معاهم صفوهالوا عشان يلفوا بيه يشحتوا
وهو دلوقتي إتجنن وبييجي هنا ياخد أكل ليه و للكلاب بتاعته وبياخد معزه أو عجله صاحيه كل مده كدا بيدبحها عنده و خد البيت إلي علي الطريق ده و اصحابه مش لاقيينهم لحد دلوقتي
وقاعد فيه الناس بتدخل فيه مبتطلعش
وساعات بنروح مبنلاقيش البيت في مكانه
وأسمع إنه بيمارس السحر بس متأكدتش من كدا
فإبعدوا عنه و متحاولوش تقربوا منه عشان ميحصلش مشاكل معاكوا"
إحنا كلنا فضلنا مبلمين للي بيقوله وأنا و علي إلي صدقنا كلامه
وسميه كانت مرعوبه من الي سمعته من علي و من الراجل العجوز
المهم بعدها بشويه طلعنا فوق سميه قعدت في أوضه لوحدها و انا و علي قعدنا في أوضه
علي قعد يتكلم معايا في الموضوع بتاع الراجل و قالي "إيه رأيك نروحله البيت و نشوف هو بيعمل إيه هناك"
قلت لعلي فضولك ده إلي هيوديك في داهيه
الراجل قالك دا مجنون و الناس بتدخل بيته مش بيطلعوا عاوز تروح هناك ليه ؟؟؟
قالي خلاص خلاص نام دلوقتي
نمت صحيت علي صوت سميه بتقولي "تامر ! تامر ! هو علي فين ؟ "
قولتلها علي كان نايم معايا دلوقتي ! ببص ملقتهوش
قولتلها يانهار مش فايت لا يكون راح للبيت ده
قولتلها الساعه كام
قالتلي "الساعه2 , أنا خايفه علي علي تعالي نروح نشوفه بسرعه"
نزلنا تحت لاقينا الراجل العجوز واقفلنا بيقولنا "متطلعوش برا البيت"
قولناله ليه ؟ و فين علي ؟
قالنا "صاحبكم طلع برا معرفتش أحوشه وقال رايح لبيت فاضل
لو روحتوا وراه هتموتوا"
قولناله إحنا مش هنقف كدا لازم نلحقه و طلعنا بسرعه من البيت
روحنا عند بيت فاضل لاقينا الباب مفتوح
دخلنا لاقينا الأرضيه كلها دم و جنازير و سكاكين
مشينا بالراحه مرعوبين مش عايزين نعمل أي صوت
طلعنا علي سلالم كدا لاقيناه
أيوا هو السفاح !!
بس كان في أوضه بعيده كدا عننا بيقطع في لحمه
شكلها لحمه بني آدمين وبيدي منها لكلب واقف فريحه
إحنا إترعبنا بس سمعنا صوت علي في أوضه تانيه بعيده عنه
إتحسبنا بالراحه عشان ميسمعناش و روحنا الأوض التانيين ندور علي علي
أول أوضه دخلناها لاقينا فيها كتب سودا و جدران محروقه كدا
وشمع كتير و أشكال غريبه علي الجدران
ولاقينا فيها مفتاح قديم كدا
سميه قالتلي "تعالي ندور في أوضه تانيه بسرعه مش وقته
عاوزين نلاقي علي "
طلعنا من الأوضه براحه و سامعين صوت السفاح بيقطع بالساطور في الأوضه بتاعته
دخلنا أوضه تانيه لاقيناها كلها دم علي الجدران
وفيها برطمانات كتير مليانه عيون
عيون كتير كلها سليمه
طلعنا من الأوضه ودخلنا في أوضه كبيره كدا لاقيناه
لاقينا علي بس كان في موقف مرعب كدا
لاقيناه متعلق بخطافين من دراعاته في قفص كبير كدا
وعينه الشمال متشاله
ورجله اليمين مقطوعه خالص و باقي جسمه كله علامات و جروح
سميه أول ما شافته إتخضت و كانت هتعيط
علي قالنا "إيه إلي بتعملوه هنا ؟؟ إهربوا بسرعه أحسن يجيلكوا
لو جه هيموتكوا وهيعمل فيكوا زي ما عمل فيا إهربوا "
سميه قالتله " لا مش هنسيبك هنا لوحدك إحنا هنطلعك من هنا قبل ما ييجي "
قعدت تدور علي حاجه تفتح بيها القفص وهي مرعوبه و بتعيط
ببص علي القفص لاقيت مكان المفتاح نفس شكل المفتاح إلي شوفته تحت
قولت لسميه خليكي هنا يا سميه متعمليش صوت أنا عارف المفتاح فين
ونزلت بسرعه بس من غير صوت للأوضه الأولي إلي كان فيها المفتاح
أترك تعليقًا